Скопје, 10 октомври 2026 година – Универзитет Скопје успешно го реализираше десеттиот Меѓународен научен конгрес ICON BEST 2026, кој обедини повеќе од 100 учесници, меѓу кои десет ректори, научници, академици и меѓународни експерти од 20 држави.

Под мотото „Дигитални хоризонти: Паметна економија и интелигентен туризам“, Конгресот беше посветен на вештачката интелигенција, дигиталната трансформација, иновациите и нивното влијание врз економијата, туризмот, образованието и општеството.

Конгресот го отвори ректорот на Универзитет Скопје, проф. д-р Аце Миленковски, нагласувајќи го значењето на меѓународната научна соработка и академското поврзување.

Меѓународни говорници и научни дискусии

Меѓу главните говорници беа проф. д-р Иво Јосиповиќ, поранешен претседател на Република Хрватска, проф. д-р Александар Зиданшек, потпретседател за наука и технологија на Светската академија за уметност и наука, и проф. д-р Орхан Хикмет Азизоглу, претседател на Меѓународниот совет на универзитети.

На Конгресот учествуваа и проф. д-р Антонио Карлес, проф. д-р Едуардо М. Пичирили и Јоланда Пердомо, меѓународен експерт за туризам, како и проф. д-р Јове Кекеновски, кој се осврна на правните и етичките аспекти на вештачката интелигенција.

Во рамките на пленарните излагања и научните сесии беа разгледани повеќе од 100 научни трудови, со фокус на современите технолошки, економски и општествени предизвици.

Девет нови меѓународни академски партнерства

Во рамките на ICON BEST 2026, Универзитет Скопје потпиша меморандуми за соработка со девет високообразовни институции: Универзитетот Атлас од Турција, Високата школа за јазични медијатори од Неапол од Италија, Универзитетот Алма Матер од Словенија, Универзитетот Фират од Турција, Универзитетот Јармук од Јордан, Универзитетот Навроз од Ирак, Универзитетот Киренија од Северен Кипар, Универзитетот Лахор од Пакистан и Истанбулскиот универзитет од Турција.

Новите партнерства отвораат можности за академска размена, мобилност на студенти и наставен кадар и реализација на заеднички образовни и научноистражувачки проекти.

Скопската декларација – знаењето во служба на мирот

Еден од најзначајните моменти на Конгресот беше потпишувањето на Скопската декларација – „Универзитетите, академиите и училиштата како засолништа на мирот“, со која се повикува на заштита на образовните, научните и културните институции од насилство и вооружени конфликти.

Декларацијата ја потпишаа проф. д-р Донато Кинигер-Пасили, проф. д-р Лудвик Топлак, проф. д-р Аце Миленковски, Алберто Зукони и проф. д-р Орхан Хикмет Азизоглу, како претставници на меѓународни академски институции и организации.

Скопската декларација ќе биде доставена до генералниот секретар на Обединетите нации, Антонио Гутереш, со порака за заштита на образованието, науката и културното наследство како темели на мирот.

Вештачката интелигенција во служба на човекот

Завршните заклучоци ги презентираше проректорот на Универзитет Скопје, проф. д-р Зоран Ивановски, истакнувајќи дека вештачката интелигенција е клучна движечка сила на глобалната трансформација, чиј потенцијал мора да се развива преку одговорно управување, континуиран развој на компетенциите, етика, доверба и одржливост.

Конгресот заврши со доделување сертификати на учесниците.

Со ICON BEST 2026, Универзитет Скопје ја потврди својата посветеност на меѓународната научна соработка, академското поврзување и развојот на знаењето во служба на човекот, општеството и мирот.